प्रमुखा विकल्पसूचिः उद्घाट्यताम्

सामवेदः/कौथुमीया/संहिता/पूर्वार्चिकः/छन्द आर्चिकः/1.1.3 तृतीयप्रपाठकः/1.1.3.5 पञ्चमी दशतिः

अभि त्वा शूर नोनुमोऽदुग्धा इव धेनवः |
ईशानमस्य जगतः स्वर्दृशमीशानमिन्द्र तस्थुषः || २३३ ||

१अ
१छ्

त्वामिद्धि हवामहे सातौ वाजस्य कार्वः |
त्वां वृत्रेष्विन्द्र सत्पतिं नरस्त्वां काष्ठास्वर्वतः || २३४ ||

२अ
२छ्

अभि प्र वः सुराधसमिन्द्रमर्च यथा विदे |
यो जरितृभ्यो मघवा पुरूवसुः सहस्रेणेव शिक्षति || २३५ ||

३अ
३छ्

तं वो दस्ममृतीषहं वसोर्मन्दानमन्धसः |
अभि वत्सं न स्वसरेषु धेनव इन्द्रं गीर्भिर्नवामहे || २३६ ||

४अ
४छ्

तरोभिर्वो विदद्वसुमिन्द्रं सबाध ऊतये |
बृहद्गायन्तः सुतसोमे अध्वरे हुवे भरं न कारिणं || २३७ ||

५अ
५छ्

तरणिरित्सिषासति वाजं पुरन्ध्या युजा |
आ व इन्द्रं पुरुहूतं नमे गिरा नेमिं तष्टेव सुद्रुवं || २३८ ||

६अ
६छ्

पिबा सुतस्य रसिनो मत्स्वा न इन्द्र गोमतः |
आपिर्नो बोधि सधमाद्ये वृधे३ऽस्मां अवन्तु ते धियः || २३९ ||

७अ
७छ्

त्वं ह्येहि चेरवे विदा भगं वसुत्तये |
उद्वावृषस्व मघवन्गविष्टय उदिन्द्राश्वमिष्टये || २४० ||

८अ
८छ्

न हि वश्चरमं च न वसिष्ठः परिमंस्ते |
अस्माकमद्य मरुतः सुते सचा विश्वे पिबन्तु कामिनः || २४१ ||

९अ
९छ्

मा चिदन्यद्वि शंसत सखायो मा रिषण्यत |
इन्द्रमित्स्तोता वृषणं सचा सुते मुहुरुक्था च शंसत || २४२ ||

१०अ
१०छ्