प्रमुखा विकल्पसूचिः उद्घाट्यताम्

सामवेदः/कौथुमीया/संहिता/पूर्वार्चिकः/छन्द आर्चिकः/1.1.5 पञ्चमप्रपाठकः/1.1.5.8 अष्टमी दशतिः





त्रिकद्रुकेषु महिषो यवाशिरं तुविशुष्मस्तृम्पत्सोममपिबद्विष्णुना सुतं यथावशं |
स ईं ममाद महि कर्म कर्त्तवे महामुरुं सैनं सश्चद्देवो देवं सत्य इन्दुः सत्यमिन्द्रं || ४५७ ||

१अ
१छ्

अयं सहस्रमानवो दृशः कवीनां मतिर्ज्योतिर्विधर्म |
ब्रध्नः समीचीरुषसः समैरयदरेपसः सोचेतसः स्वसरे मन्युमन्तश्चिता गोः || ४५८ ||

२अ
२छ्

एन्द्र याह्युप नः परावतो नायमच्छा विदथानीव सत्पतिरस्ता राजेव सत्पतिः |
हवामहे त्वा प्रयस्वन्तः सुतेष्वा पुत्रासो न पितरं वाजसातये मंहिष्ठं वाजसातये || ४५९ ||

३अ
३छ्

तमिन्द्रं जोहवीमि मघवानमुग्रं सत्रा दधानमप्रतिष्कुतं श्रवांसि भूरिः |
मंहिष्ठो गीर्भिरा च यज्ञियो ववर्त्त राये नो विश्वा सुपथा कृणोतु वज्री || ४६० ||

४अ
४छ्

अस्तु श्रौष्ट्पुरो अग्निं धिया दध आ नु त्यच्छर्धो दिव्यं वृणीमह इन्द्रवायू वृणीमहे |
यद्ध क्राणा विवस्वते नाभा सन्दाय नव्यसे |
अध प्र नूनमुप यन्ति धीतयो देवांअच्छा न धीतयः || ४६१ ||

५अ
५छ्
५ए

प्र वो महे मतयो यन्तु विष्णवे मरुत्वते गिरिजा एवयामरुत् |
प्र शर्धाय प्र यज्यवे सुखादये तवसे भन्ददिष्टये धुनिव्रताय शवसे || ४६२ ||

६अ
६छ्

अया रुचा हरिण्या पुनानो विश्वा द्वेषांसि तरति सयुग्वभिः सूरो न सयुग्वभिः |
धारा पृष्ठस्य रोचते पुनानो अरुषो हरिः |
विश्वा यद्रूपा परियास्यृक्वभिः सप्तास्येभिरृक्वभिः || ४६३ ||

७अ
७छ्
७ए

अभि त्यं देवं सवितारमोण्योः कविक्रतुमर्चामि सत्यसवं रत्नधामभि प्रियं मतिम्
ऊर्ध्वा यस्यामतिर्भा अदिद्युतत्सवीमनि हिरण्यपाणिरमिमीत सुक्रतुः कृपा स्वः || ४६४ ||

८अ
८छ्

अग्निं होतारं मन्ये दास्वन्तं वसोः सूनुं सहसो जातवेदसं विप्रं न जातवेदसं |
य ऊर्ध्वया स्वध्वरो देवो देवाच्या कृपा |
घृतस्य विभ्राष्टिमनु शुक्रशोचिष आजुह्वानस्य सर्पिषः || ४६५ ||

९अ
९छ्
९ए

तव त्यन्नर्यं नृतोऽप इन्द्र प्रथमं पूर्व्यं दिवि प्रवाच्यं कृतं |
यो देवस्य शवसा प्रारिणा असु रिणन्नपः |
भुवो विश्वमभ्यदेवमोजसा विदेदूर्जं शतक्रतुर्विदेदिषं || ४६६ ||

१०अ
१०छ्
१०ए