सामवेदः/कौथुमीया/संहिता/पूर्वार्चिकः/छन्द आर्चिकः/1.1.6 षष्ठप्रपाठकः/1.1.6.2 द्वितीया दशतिः

अचिक्रदद्वृषा हरिर्महान्मित्रो न दर्शतः | सं सूर्येण दिद्युते || ४९७ ||	१अ १छ्
आ ते दक्षं मयोभुवं वह्निमद्या वृणीमहे | पान्तमा पुरुस्पृहं || ४९८ ||	२अ २छ्
अध्वर्यो अद्रिभिः सुतं सोमं पवित्र आ नय | पुनीहीन्द्राय पातवे || ४९९ ||	३अ ३छ्
तरत्स मन्दी धावति धारा सुतस्यान्धसः | तरत्स मन्दी धावति || ५०० ||	४अ ४छ्
आ पवस्व सहस्रिणं रयिं सोम सुवीर्यं | अस्मे श्रवांसि धारय || ५०१ ||	५अ ५छ्
अनु प्रत्नास आयवः पदं नवीयो अक्रमुः | रुचे जनन्त सूर्यं || ५०२ ||	६अ ६छ्
अर्षा सोम द्युमत्तमोऽभि द्रोणानि रोरुवत् | सीदन्योनौ योनेष्वा || ५०३ ||	७अ ७छ्
वृषा सोम द्युमां असि वृषा देव वृषव्रतः | वृषा धर्माणि दध्रिषे || ५०४ ||	८अ ८छ्
इषे पवस्व धारया मृज्यमानो मनीषिभिः | इन्दो रुचाभि गा इहि || ५०५ ||	९अ ९छ्
मन्द्रया सोम धारया वृषा पवस्व देवयुः | अव्यो वारेभिरस्मयुः || ५०६ ||	१०अ १०छ्
अया सोम सुकृत्यपा महान्त्सन्नभ्यवर्धथाः | हिन्दान इद्वृषायसे || ५०७ ||	११अ ११छ्
अयं विचर्षणिर्हितः पवमानः स चेतति | हिन्वान आप्यं बृहत् ||५०८ ||	१२अ १२छ्
प्र ण इन्दो महे तु न ऊर्मिं न बिभ्रदर्षसि | अभि देवां अयास्यः || ५०९ ||	१३अ १३छ्
अपघ्नन्पवते मृधोऽप सोमो अराव्णः | गच्छन्निन्द्रस्य निष्कृतं || ५१० ||	१४अ १४छ्