सामवेदः/कौथुमीया/संहिता/पूर्वार्चिकः/छन्द आर्चिकः/1.1.6 षष्ठप्रपाठकः/1.1.6.3 तृतीया दशतिः

पुनानः सोम धारयापो वसानो अर्षसि | आ रत्नधा योनिमृतस्य सीदस्युत्सो देवो हिरण्ययः || ५११ ||	१अ १छ्
परीतो षिञ्चता सुतं सोमो य उत्तमं हविः | दधन्वां यो नर्यो अप्स्वा३न्तरा सुषाव सोममद्रिभिः || ५१२ ||	२अ २छ्
आ सोम स्वानो अद्रिभिस्तिरो वाराण्यव्यया | जनो न पुरि चम्वोर्विशद्धरिः सदो वनेषु दध्रिषे || ५१३ ||	३अ ३छ्
प्र सोम देववीतये सिन्धुर्न पिप्ये अर्णसा | अंशोः पयसा मदिरो न जागृविरच्छा कोशं मधुश्चुतं || ५१४ ||	४अ ४छ्
सोम उ ष्वाणः सोतृभिरधि ष्णुभिरवीनां | अश्वयेव हरिता याति धारया मन्द्रया याति धारया || ५१५ ||	५अ ५छ्
तवाहं सोम रारण सख्य इन्दो दिवेदिवे | पुरूणि बभ्रो नि चरन्ति मामव परिधींरति तां इहि || ५१६ ||	६अ ६छ्
मृज्यमानः सुहस्त्या समुद्रे वाचमिन्वसि | रयिं पिशङ्गं बहुलं पुरुस्पृहं पवमानाभ्यर्षसि || ५१७ ||	७अ ७छ्
अभि सोमास आयवः पवन्ते मद्यं मदं | समुद्रस्याधि विष्टपे मनीषिणो मत्सरासो मदच्युतः || ५१८ ||	८अ ८छ्
पुनानः सोम जागृविरव्या वारैः परि प्रियः | त्वं विप्रो अभवोऽङ्गिरस्तम मध्वा यज्ञं मिमिक्ष णः || ५१९ ||	९अ ९छ्
इन्द्राय पवते मदः सोमो मरुत्वते सुतः | सहस्रधारो अत्यव्यमर्षति तमी मृजन्त्यायवः || ५२० ||	१०अ १०छ्
पवस्व वाजसातमोऽभि विश्वानि वार्या | त्वं समुद्रः प्रथमे विधर्मं देवेभ्यं सोम मत्सरः || ५२१ ||	११अ ११छ्
पवमाना असृक्षत पवित्रमति धारया | मरुत्वन्तो मत्सरा इन्द्रिया हया मेधामभि प्रयांसि च || ५२२ ||	१२अ १२छ्