बृहत्संहिता/अध्यायः ३५
| ← अध्यायः ३४ | बृहत्संहिता अध्यायः ३५ वराहमिहिरः |
अध्यायः ३६ → |
३५ इन्द्रायुद्धलक्षणाध्यायः ।।
सूर्यस्य विविधवर्णाः पवनेन विघट्टिताः कराः साभ्रे ।
वियति धनुःसंस्थाना ये दृश्यन्ते तदिन्द्रधनुः ।। ३५.०१ ।।
के चिदनन्तकुलौरगनिःश्वासौद्भूतं आहुराचार्याः ।
तद्यायिनां नृपाणां अभिमुखं अजयऽवहं भवति ।। ३५.०२ ।।
अच्छिन्नं अवनिगाढं द्युतिमत्स्निग्धं घनं विविधवर्णम् ।
द्विरुदितं अनुलोमं च प्रशस्तं अम्भः प्रयच्छति च ।। ३५.०३ ।।
विदिगुद्भूतं दिक्स्वामिनाशनं व्यभ्रजं मरककारि ।
पाटलपीतकनीलैः शस्त्राग्निक्षुत्कृता दोषाः ।। ३५.०४ ।।
जलमध्ये +अनावृष्टिर्भुवि सस्यवधस्तरौ स्थिते व्याधिः ।
*वाल्मीके[क्.वल्मीके] शस्त्रभयं निशि सचिववधाय धनुरैन्द्रम् ।। ३५.०५ ।।
वृष्टिं करोत्यवृष्ट्यां वृष्टिं वृष्ट्यां निवारयत्यैन्द्र्याम् ।
पश्चात्सदैव वृष्टिं कुलिशभृतश्चापं आचष्टे ।। ३५.०६ ।।
चापं मघोनः कुरुते निशायाम्
आखण्डलायां दिशि भूपपीडाम् ।
याम्यापरौदक्प्रभवं निहन्यात्
सेनापतिं नायकमन्त्रिणौ च ।। ३५.०७ ।।
निशि सुरचापं सितवर्णाद्यं जनयति पीडां द्विजपूर्वाणाम् ।
भवति च यस्यां दिशि तद्देश्यं नरपतिमुख्यं नचिराद्धन्यात् ।। ३५.०८ ।।