महाभारतम्-11-स्त्रीपर्व-014
| ← स्त्रीपर्व-013 | महाभारतम् स्त्रीपर्व महाभारतम्-11-स्त्रीपर्व-014 वेदव्यासः |
स्त्रीपर्व-015 → |
भीमगान्धारीसंवादः।। 1 ।।
| वैशम्पायन उवाच। | 11-14-1x |
|
तच्छ्रुत्वा वचनं तस्या भीमसेनोऽथ भीतवत्। गान्धारीं प्रत्युवाचेदं वचः सानुनयं तदा।। | 11-14-1a 11-14-1b |
|
अधर्मो यदि वा धर्मस्त्रासात्तत्र मया कृतः। आत्मानं त्रातुकामेन तन्मे त्वं क्षन्तुमर्हसि।। | 11-14-2a 11-14-2b |
|
न हि युद्धेन पुत्रस्ते धर्मेण स महाबलः। दुःशक्यः केनचिद्धर्तुमतो विषममाचरम्।। | 11-14-3a 11-14-3b |
|
अधर्मेण जितः पूर्वं तेन चापि युधिष्ठिरः। निकृताश्च सदैव स्म तो विषममाचरम्।। | 11-14-4a 11-14-4b |
|
सैन्यस्यैकोऽवशिष्टोऽयं गदायुद्धे च वीर्यवान्। न त्यक्ष्यति हृतं राज्यमिति वै तत्कृतं मया।। | 11-14-5a 11-14-5b |
|
एकपत्नीं च पाश्चालीमेकवस्त्रां रजस्वलाम्। भवत्या विदितं सर्वमुक्तवान्यत्सुतस्तव।। | 11-14-6a 11-14-6b |
|
सुयोधनं त्वसंहृत्य न शक्या भूः ससागरा। केवला भोक्तुमस्माभिरतश्चैतत्कृतं मया।। | 11-14-7a 11-14-7b |
|
तच्चाप्यप्रियमस्माकं पुत्रस्ते समुपाचरत्। द्रौपद्या यत्सभामध्ये सव्यमूरुमदर्शयत्।। | 11-14-8a 11-14-8b |
|
तत्रैव वध्यः सोऽस्माकं दुराचारोऽप्ब ते सुतः। धर्मराजाज्ञया चैव स्थिताः स्म समये पुरा।। | 11-14-9a 11-14-9b |
|
वैरमुद्दीपितं राज्ञि पुत्रेण तव यन्महत्। क्लेशिताश्च वने नित्यं तत एतत्कृतं मया।। | 11-14-10a 11-14-10b |
|
वैरस्यास्य गताः पारं हत्वा दुर्योधनं रणे। राज्यं युधिष्ठिरे प्राप्ते वयं च गतमन्यवः।। | 11-14-11a 11-14-11b |
| गान्धार्युवाच। | 11-14-12x |
|
न तस्यैवं वधस्तात यं प्रशंससि मे सुतम्। कृतवांश्चापि तत्सर्वं यदिदं भाषसे मयि।। | 11-14-12a 11-14-12b |
|
हताश्वे नकुले यत्तु वृषसेनेन भारत। अपिबः शोणितं सङ्ख्ये दुःशासनशरीरजम्।। | 11-14-13a 11-14-13b |
|
सद्भिर्विगर्हितं घोरमनार्यजनसेवितम्। क्रूरं कर्माकृथास्तस्मात्तदयुक्तं वृकोदर।। | 11-14-14a 11-14-14b |
| भीम उवाच। | 11-14-15x |
|
हताश्वं नकुलं दृष्ट्वा वृषसेनेन संयुगे। शत्रूणां तु प्रहृष्टानां त्रासः सञ्जनितो मया।। | 11-14-15a 11-14-15b |
|
`स प्रतिज्ञामकरवं पिबाम्यसृगरेरिति'। रुधिरं नातिचक्राम दन्तोष्ठादम्ब मा शुचः।। | 11-14-16a 11-14-16b |
|
[अन्यस्यापि न पातव्यं रुधिरं किंपुनः स्वकम्। यथैवात्मा तथा भ्राता विशेषो नास्ति कश्चन।। | 11-14-17a 11-14-17b |
|
वैवस्तितो हि तद्वेद यथावत्कुलनन्दिनि। मा कृथा हृदि तन्मातर्न तत्पीतं मयाऽनधे।। | 11-14-18a 11-14-18b |
|
केशपक्षपरामर्शे द्रौपद्या द्यूतकारिते। क्रोधाद्यदब्रवं चाहं तच्च मे हृदि वर्तते।। | 11-14-19a 11-14-19b |
|
क्षत्रधर्माच्च्युतो राज्ञि भवेयं शाश्वतीः समाः। प्रतिज्ञां तामनिस्तीर्य ततस्तत्कृतवानहम्।। | 11-14-20a 11-14-20b |
|
अनिगृह्य पुरा पुत्रानस्मस्वनपकारिषु। न ममार्हसि कल्याणि दोषेण परिशङ्कितुम्।। | 11-14-21a 11-14-21b |
| गान्धार्युवाच। | 11-14-22x |
|
वृद्धस्यास्य शतं पुत्रान्निघ्नंस्त्वमपराजितः। कस्मानाशेषयः कञ्चिद्येनाल्पमपराधितम्।। | 11-14-22a 11-14-22b |
|
सन्तानमावयोस्तात वृद्धयोर्हृतराज्ययोः। नाशेषयः कथं यष्टिमेकां वृद्धयुगस्य वै।। | 11-14-23a 11-14-23b |
|
शेषे ह्यवस्थिते तात पुत्राणामल्पकेऽपि च। मन्ददुःखं भवेदद्य यदि त्वं धर्ममाचरेः।। | 11-14-24a 11-14-24b |
|
।। इति श्रीमन्महाभारते स्त्रीपर्वणि जलप्रदानिकपर्वणि चतुर्दशोऽध्यायः।। 14 ।। |
11-14-6 उक्तवान् नहि ते पतयः सन्तीत्यादि। राजपुत्रीं च पाञ्चलीमिति झ.पाठः।। 11-14-14 चतुर्दशोऽध्यायः।।
| स्त्रीपर्व-013 | पुटाग्रे अल्लिखितम्। | स्त्रीपर्व-015 |