महाभारतम्-15-आश्रमवासिकपर्व-034
| ← आश्रमवासिकपर्व-033 | महाभारतम् पञ्चादशपर्व महाभारतम्-15-आश्रमवासिकपर्व-034 वेदव्यासः |
आश्रमवासिकपर्व-035 → |
व्यासेन निशायां गङ्गाजलावगाहनेन समाह्नाने पुरा समरनिहतैः कुरुपाण्डवोभयपक्षीयैः सर्वैः स्वस्वाभरणायुधवाहनादिभिः सह सलिलादुद्गम्य तीरोत्तरणम्।। 1 ।। धृतराष्ट्रेण व्यासप्रसादलब्धदिव्यचक्षुषा दुर्योधनादीनां सर्वेषामवलोकनम्।। 2 ।।
| वैशम्पायन उवाच। | 15-34-1x |
|
ततो निशायां प्राप्तायां कृतसायाह्निकक्रियाः। व्यासमभ्यगमन्सर्वे ये तत्रासन्समागताः।। | 15-34-1a 15-34-1b |
|
धृतराष्ट्रस्तु धर्मात्मा पाण्डवैः सहितस्तदा। शुचिरेकमनाः सार्धमृषिभिस्तैरुपाविशत्।। | 15-34-2a 15-34-2b |
|
गान्धार्या सह नार्यस्तु सहिताः समुपाविशन्। पौरजानपदश्चापि जनः सर्वो यथा वयः।। | 15-34-3a 15-34-3b |
|
ततो व्यासो महातेजाः पुण्यं भागीरथीजलम्। अवतीर्याजुहावाथ सँर्वाल्लोकान्महामुनिः।। | 15-34-4a 15-34-4b |
|
पाण्डवानां च ये योधाः कौरवाणां च सर्वशः। राजानश्च महाभागा नानादेशनिवासिनः। `प्रतीक्ष्य तस्थुस्ते सर्वे तेषामागमनं प्रति।।' | 15-34-5a 15-34-5b 15-34-5c |
|
ततः सुतुमुलः शब्दो जलान्ते जनमेजय। प्रादुरासीद्यथायोगं कुरुपाण्डवसेनयोः।। | 15-34-6a 15-34-6b |
|
ततस्ते पार्थिवाः सर्वे भीष्मद्रोणपुरोगमाः। ससैन्याः सलिलात्तस्मात्समुत्तस्थुः सहस्रशः।। | 15-34-7a 15-34-7b |
|
विराटद्रुपदौ चैव सहपुत्रौ ससैनिकौ। द्रौपदेयाश्च सौभद्रो राक्षसश्च घटोत्कचः।। | 15-34-8a 15-34-8b |
|
कर्णदुर्योधनौ चैव शकुनिश्च महारथः। दुःशासनादयश्चैव धार्तराष्ट्रा महाबलाः।। | 15-34-9a 15-34-9b |
|
जारासन्धिर्भगदत्तो जलसन्धश्च वीर्यवान्। भूरिश्रवाः शलः शल्यो वृषसेनश्च सानुजः।। | 15-34-10a 15-34-10b |
|
लक्ष्मणो राजपुत्रश्च धृष्टद्युम्नस्सहात्मजः। शिखण्डिपुत्राः सर्वे च धृष्टकेतुश्च सानुज।। | 15-34-11a 15-34-11b |
|
अचलो वृषकश्चैव राक्षसश्चाप्यलायुधः। बाह्लिकः सोमदत्तश्च चेकितानश्च पार्थिवः।। | 15-34-12a 15-34-12b |
|
एते चान्ये च बहवो बहुत्वाद्ये न कीर्तिताः। सर्वे भासुरदेहास्ते समुत्तस्थुर्जलात्ततः।। | 15-34-13a 15-34-13b |
|
यस्य् वीरस्य यो वेषो यो ध्वजो यच्च वाहनम्। यद्वर्म यत्प्रहरणं तेन तेन स दृश्यते।। | 15-34-14a 15-34-14b |
|
दिव्यांबरधराः सर्वे सर्वे भ्राजिष्णुकुण्डलाः। निर्वैरा निरहङ्कारा विगतक्रोधमत्सराः।। | 15-34-15a 15-34-15b |
|
गन्धर्वैरुपगीयन्तः स्तूयमानाश्च बन्दिभिः। दिव्यमाल्यस्रजोपेतास्तथा दिव्याप्सरोवृताः।। | 15-34-16a 15-34-16b |
|
धृतराष्ट्रस्य च तदा दिव्यं चक्षुर्नराधिप। मुनिः सत्यवतीपुत्रः प्रीतः प्रादात्तपोबलात्।। | 15-34-17a 15-34-17b |
|
दिव्यज्ञानबलोपेता गान्धारी च यशस्विनी। ददर्श पुत्रांस्तान्सर्वान्ये चान्येऽपि मृघे हताः।। | 15-34-18a 15-34-18b |
|
तदद्भुतमचिन्त्यं च सुमहद्रोमहर्षमम्। विस्मितः स जनः सर्वो ददर्शानिमिषेक्षणः।। | 15-34-19a 15-34-19b |
|
तदुत्सवमहोदग्रं हृष्टनारीनराकुलम्। आश्चर्यभूतं ददृशे चित्रं पटगतं यथा।। | 15-34-20a 15-34-20b |
|
धृतराष्ट्रस्तु तान्सर्वान्पश्यन्दिव्येन चक्षुषा। मुमुदे भरतश्रेष्ठ प्रसादात्तस्य वै मुनेः।। | 15-34-21a 15-34-21b |
|
।। इति श्रीमन्महाभारते आश्रमवासिकपर्वणि पुत्रदर्शनपर्वणि चतुस्त्रिंशोऽध्यायः।। 34 ।। |
| आश्रमवासिकपर्व-033 | पुटाग्रे अल्लिखितम्। | आश्रमवासिकपर्व-035 |