नारदपुराणम्- पूर्वार्धः/अध्यायः ७७
नारद उवाच ।।
साधु साधु महाप्राज्ञ सर्व तंत्रविशारद ।।
त्वया मह्यं समाख्यातं विधानं तंत्रगोपितम् ।। ७७-१ ।।
अधुना तु महाभाग कीर्तवीर्यहनूमतोः ।।
कवचे श्रोतुमिच्छामि तद्वदस्वकृपानिधे ।। ७७-२ ।।
सनत्कुमार उवाच ।।
श्रृणु विप्रेन्द्र वक्ष्यामि कवचं परमाद्भुतम् ।।
कार्तवीर्यस्य येनासौ प्रसन्नः कार्यसिद्धिकृत् ।। ७७-३ ।।
सहस्रादित्यसंकाशे नानारत्नसमुज्ज्वंले ।।
भास्वद्ध्वजपताकाढ्ये तुरगायुतभूषिते ।। ७७-४ ।।
महासंवर्तकांभोधिभीमरावविराविणि ।।
समुद्धृतमहाछत्र्रवितानितवियत्पथे ।। ७७-५ ।।
महारथवरे दीप्तनानायुधविराजिते ।।
सुस्थितं विपुलोदारं सहस्रभुजमंडितम् ।। ७७-६ ।।
वामैरुद्दंडकोदंडान्दधानमपरैः शरान् ।।
किरीटहारमुकुटकेयूरवलयांगदैः ।। ७७-७ ।।
मुद्रिकोदरबन्धाद्यैर्मौंजीनूपुरकादिभिः ।।
भूषितं विविधाकल्पैर्भास्वरैः सुमहाधनैः ।। ७७-८ ।।
आबद्धकवचं वीरं सुप्रसन्नाननांबुजम् ।।
धनुर्ज्या सिंहनादेन कंपयंतं जगत्र्रयम् ।। ७७-९ ।।
सर्वशत्रुक्षयकरं सर्वव्याधिविनाशनम् ।।
सर्वसंपत्प्रदातारं विजयश्रीनिषेवितम् ।। ७७-१0 ।।
सर्वसौभाग्यदं भद्रं भक्ताभयविधायिनम् ।।
दिव्यमाल्यानुलेपाढ्यं सर्वलक्षणसंयुतम् ।। ७७-११ ।।
रथनागाश्वपादातवृंदमध्यगमीश्वरम् ।।
वरदं चक्रवर्तीनं सर्वलोकैकपालकम् ।। ७७-१२ ।।
समानोदितसाहस्रदिवाकरसमद्युतिम् ।।
महायोगभवैश्वर्यकीर्त्याक्रांतजगत्र्रयम् ।। ७७-१३ ।।
श्रीमच्चक्रं हरेरंशादवतीर्णं महीतले ।।
सम्यगात्मादिभेदेन ध्यात्वा रक्षामुदीरयेत् ।। ७७-१४ ।।
अस्यांगमूर्तयः पंच पांतु मां स्फटिकोज्ज्वलाः ।।
अग्नीशासुरवायव्यकोणेषु हृदयादिकाः ।। ७७-१५ ।।
सर्वतोस्रज्वलद्रूपा दरचर्मासिपाणयः ।।
अव्याहतबलैश्वर्यशक्तिसामर्थ्यविग्रहाः ।। ७७-१६ ।।
क्षेमंकरीशक्तियुतश्चौरवर्गविभञ्जनः ।।
प्राचीं दिशं रक्षतु मे बाणबाणासनायुधः ।। ७७-१७ ।।
श्रीकरीशक्तिसहितो मारीभयविनाशकः ।।
शरचापधरः श्रीमान् दिशं मे पातु दक्षिणाम् ।। ७७-१८ ।।
महावश्यकरीयुक्तः सर्वशत्रुविनाशकृत् ।।
महेषुचापधृक्पातु मम प्राचेतसीं दिशम् ।। ७७-१९ ।।
यशःकर्या समायुक्तो दैत्यसंघविनाशनः ।।
परिरक्षतु मे सम्यग्विदिशं चैत्रभानवीम् ।। ७७-२0 ।।
विद्याकरीसमायुक्तः सुमहहुःखनाशनः ।।
पातु मे नैर्ऋतीं चापपाणिर्विदिशमीश्वरः ।। ७७-२१ ।।
धनकर्या समायुक्तो महादुरित नाशनः ।।
इष्वासनेषुधृक्पातु विदिशं मम वायवीम् ।। ७७-२२ ।।
आयुःकर्या युतः श्रीमान्महाभयविनाशनः ।।
चापेषुधारी शैवीं मे विदिशं परिरक्षतु ।। ७७-२३ ।।
विजयश्रीयुतः साक्षात्सहस्रारधरो विभुः ।।
दिशमूर्द्ध्वामवतु मे सर्वदुष्टभयंकरः ।। ७७-२४ ।।
शंखभृत्सुमहाशक्तिसंयुतोऽप्यधरां दिशम् ।।
परिरक्षतु मे दुःखध्वांतसम्भेदभास्करः ।। ७७-२५ ।।
महायोगसमायुक्तः सर्वदिक्चक्रमंडलः ।।
महायोगीश्वरः पातु सर्वतो मम पद्मभृत् ।। ७७-२६ ।।
एतास्तु मूर्तयो रक्ता रक्तमाल्यांशुकावृताः ।।
प्रधानदेवतारूपाः पृथग्रथवरे स्थिताः ।। ७७-२७ ।।
शक्तयः पद्महस्ताश्चत नीलेंदीवरसन्न्निभाः ।।
शुक्लमाल्यानुवसनाः सुलिप्ततिलकोज्ज्वलाः ।। ७७-२८ ।।
तत्पार्शदेश्वराः स्वस्ववाहनायुधभूषणाः ।।
स्वस्वदिक्षु स्थिताः पांतु मामिंद्राद्या महाबलाः ।। ७७-२९ ।।
एतस्तस्य समाख्याताः सर्वावरणदेवताः ।।
सर्वतो मां सदा पातुं सर्वशक्तिसमन्विताः ।। ७७-३0 ।।
हृदये चोदरे नाभौ जठरे गुह्यमण्डले ।।
तेजोरूपाः स्थिताः पातुं वांछासुखनद्रुमाः ।। ७७-३१ ।।
दिशं चान्ये महावर्णा मन्त्ररूपा महोज्ज्वलाः ।।
व्यापकत्वेन पांत्वस्मानापादतलमस्तकम् ।। ७७-३२ ।।
कार्तवीर्यः शिरः पातु ललाटं हैहयेश्वरः ।।
सुमुखो मे मुखं पातु कर्णौ व्याप्तजगत्त्रयः ।। ७७-३३ ।।
सुकुमारो हनुं पातु भ्रूयुगं मे धनुर्धरः ।।
नयनं पुंमडरीकाक्षगो नासिकां मे गुणाकरः ।। ७७-३४ ।।
अधरोष्ठौ सदा पातु ब्रह्ज्ञेयो द्विजान्कविः ।।
सर्वशास्त्रकलाधारी जिह्वां चिबुकमव्ययः ।। ७७-३५ ।।
दत्तात्रेयप्रियः कंठं स्कंधौ राजकुलेश्वरः ।।
भुजौ दशास्यदर्पघ्नो हृदयं मे महाबलः ।। ७७-३६ ।।
कुक्षिं रक्षतु मे विद्वान् वक्षः परपुरंजयः ।।
करौ सर्वार्थदः पातुकराग्राणि जगत्प्रियः ।। ७७-३७ ।।
रेवांबगुलीलासंहप्तो जठरं परिरक्षतु ।।
वीरशूरस्तु मे नाभिं पार्श्वौ मे सर्वदुष्टहा ।। ७७-३८ ।।
सहस्रभुजनृत्पृष्टं सप्तद्वीपाधिपः कटिम् ।।
ऊरू माहिष्मतीनाथो जानुनी वल्लभो भुवः ।। ७७-३९ ।।
जंघे वीराधिपः पातु पातु पादौ मनोजवः ।।
पातु सर्वायुधधरः सर्वांगं सर्वमर्मसु ।। ७७-४0 ।।
सर्वदुष्टांतकः पातु धात्वष्टककलेवरम् ।।
प्राणादिदशजीवेशान्सर्वशिष्टेष्टदोऽवतु ।। ७७-४१ ।।
वशीकृतेंद्रियग्रामः पातु सर्वेन्द्रियाणि मे ।।
अनुक्तमपि यत्स्थान शरीरांतर्बहिश्च यत् ।। ७७-४२ ।।
तत्सर्वं पातु मे सर्वलोकनाथेश्वरेश्वरः ।।
वज्रात्सारतरं चेदं शरीरं कवचावृतम् ।। ७७-४३ ।।
बाधाशतविनिर्मुक्तमस्तु मे भयवर्जितम् ।।
बद्धेदं कवचं दिव्यमभेद्यं हैहयेशितुः ।। ७७-४४ ।।
विचरामि दिवा रात्रौ निर्भयेनांतरात्मना ।।
राजमार्गे महादुर्गे मार्गे चौरा दिसंकुले ।। ७७-४५ ।।
विषमे विपिने घोरे दावाग्नौ गिरिकंदरे ।।
संग्रामे शस्त्रसंघाते सिंहव्याघ्रनिषेविते ।। ७७-४६ ।।
गह्वरे सर्वसंकीर्णे संध्याकाले नृपालये ।।
विवादे विपुलावर्ते समुद्रे च नदीतटे ।। ७७-४७ ।।
परिपंथिजनाकीर्णे देशे दस्युगणावृते ।।
सर्वस्वहरणे प्राप्ते प्राप्ते प्राणस्य संकटे ।। ७७-४८ ।।
नानारोगज्वरावेशे पिशाचप्रेतयातने ।।
मारीदुःस्वप्नपीडासु क्लिष्टे विश्वासघातके ।। ७७-४९ ।।
शारीरे च महादुःखे मानसे च महाज्वरे ।।
आधिव्याधिभये विघ्नज्वालोपद्रवकेऽपि च ।। ७७-५0 ।।
न भवतु भयं किंचित्कवचेनावृतस्य मे ।।
आंगुतुकामानखिलानस्मद्वसुविलुंपकान् ।। ७७-५१ ।।
निवारयतु दोर्दंडसहस्रेण महारथः ।।
स्वकरोद्धृतसाहस्रपाशबद्धान्सुदुर्जयान् ।। ७७-५२ ।।
संरुद्धूगतिसामर्थ्यान्करोतु कृतवीर्यजः ।।
सृणिसाहस्रनिर्भिन्नान्सहस्रशरखंडितान् ।। ७७-५३ ।।
राजचूडामणिः क्षिप्रं करोत्वस्मद्विरोधकान् ।।
खङ्ग साहस्रदलितान्सहस्रमुशलार्दितान् ।। ७७-५४ ।।
चौरादि दुष्टसत्त्वौघान्करोतु कमलेक्षणः ।।
स्वशंखनादसंत्रस्तान्सहस्रारसहस्रभृत् ।। ७७-५५ ।।
अवतारो हरेः साक्षात्पालयत्वखिलं मम ।।
कार्तवीर्य महावीर्य सर्वदुष्टविनाशन ।। ७७-५६ ।।
सर्वत्र सर्वदा दुष्टचौरान्नाशाय नाशय ।।
किं त्वं स्वपिषि दुष्टघ्न किं तिष्टसि चिरायासि ।। ७७-५७ ।।
उत्तिष्ठ पाहि नः सर्वभयेभ्यः स्वसुतानिव ।।
ये चौरा वसुहर्तारो विद्विषो ये च हिंसकाः ।। ७७-५८ ।।
साधुभीतिकरा दुष्टाश्छद्मका ये दुराशयाः ।।
दुर्हृदो दुष्टभू पाला दुष्टामात्याश्च पापकाः ।। ७७-५९ ।।
ये च कार्यविलोप्तोरो ये खलाः परिपंथिनः ।।
सर्वस्वहारिणां ये च पंच मायाविनोऽपरेः ।। ७७-६0 ।।
महाक्लेशकरा म्लेच्छा दस्यवो वृषलाश्च ये ।।
येऽग्निदा गरदातारो वंचकाः शस्त्रपाणयः ।। ७७-६१ ।।
ये पापा दुष्टकर्माणो दुःखदा दुष्टबुद्धयः ।।
व्याजकाः कुपथासक्ता ये च नानाभयप्रदाः ।। ७७-६२ ।।
छिद्रान्वेषरता नित्यं येऽस्मान्बाधितुमुद्यताः ।।
ते सर्वे कार्तवीर्यस्य महाशंखरवाहताः ।। ७७-६३ ।।
सहसा विलयं यान्तु दूरदिव विमोहिताः ।।
ये दानवा महादित्या ये यक्षा ये च राक्षसाः ।। ७७-६४ ।।
पिशाचा ये महासत्त्वा ये भूतब्रह्मराक्षसाः ।।
अपस्मारग्रहा ये च ये ग्रहाः पिशिताशनाः ।। ७७-६५ ।।
महालोहितभोक्तारो वेताला ये च गुह्यकाः ।।
गंधर्वाप्सरसः सिद्धा ये च देवादियोनयः ।। ७७-६६ ।।
डाकिन्यो द्रुणसाः प्रेताः क्षेत्रपाला विनायकाः ।।
महाव्याघ्रमहामेघा महातुरागरूपकाः ।। ७७-६७ ।।
महागजा महासिंहा महामहिषयोनयः ।।
ऋक्षवाराहशुनकवानरोलूकमूर्तयः ।। ७७-६८ ।।
महोष्ट्रखरमार्जारसर्पगोवृषमस्तकाः ।।
नानारूपा महासत्त्वा नानाक्लेशसहस्रदाः ।। ७७-६९ ।।
नानारोगकराः क्षुद्रा महावीर्या महाबलाः ।।
वातिकाः पैत्तिका घोरा श्लैष्मिकाः सान्निपातिकाः ।। ७७-७0 ।।
माहेश्वरा वैष्णवाश्च वैरिंच्याश्च महाग्रहाः ।।
स्कांदा वैनायकाः क्रूरा ये च प्रमथगुह्यकाः ।। ७७-७१ ।।
महाशत्रुहा रौद्रा महामारीमसूरिकाः ।।
ऐकाहिका व्द्याहिकाश्च त्र्याहिकाश्च महाज्वराः ।। ७७-७२ ।।
चातुर्थिकाः पाक्षिकाश्च मास्याः षाण्मासिकाश्च ये ।।
सांवत्सरा दुर्निवार्या ज्वराः परमदारुणाः ।। ७७-७३ ।।
स्वाप्निका ये महोत्पाता ये च दुःस्वाप्निका ग्रहाः ।।
कूष्मांडा जृंभिका भौमा द्रोणाः सान्निध्यवंचकाः ।। ७७-७४ ।।
भ्रमिकाः प्राणहर्तारो ये च बालग्रहादयः ।।
मनोबुद्वीन्द्रियहराः स्फोटकाश्च महाग्रहाः ।। ७७-७५ ।।
महाशना बलिभुजो महाकुणपभोजनाः ।।
दिवाचरा रात्रिचरा ये च संध्यासु दारुणाः ।। ७७-७६ ।।
प्रमत्ता वाऽप्रमत्ता वै ये मां बाधितुमुद्यताः ।।
ते सर्वे कार्त्तवीर्यस्य धनुर्मुक्तशराहताः ।। ७७-७७ ।।
सहस्रधा प्रणश्यंतु भग्नसत्त्वबलोद्यमाः ।।
ये सर्पा ये महानागा महागिरिबिलेशयाः ।। ७७-७८ ।।
कालव्याला महादंष्ट्रा महाजगरसंज्ञकाः ।।
अनंतशूलिकाद्याश्च दंष्ट्राविषमहाभयाः ।। ७७-७९ ।।
अनेकशत शीर्षाश्च खंडपुच्छाश्च दारुणाः ।।
महाविषजलौकाश्च वृश्चिका रुक्तपुच्छकाः ।। ७७-८0 ।।
आशीविषाः कालकूटा महाहालाहलाह्वयाः ।।
जलसर्पा जलव्याला जलग्राहाश्च कच्छपाः ।। ७७-८१ ।।
मत्स्यका विषपुच्छाश्च ये चान्ये जलवासिनः ।।
जलजाः स्थलजाश्चैव कृत्रिमाश्च महाविषाः ।। ७७-८२ ।।
गुप्तरूपा गुप्तविषा मूषिका गृहगोधिकाः ।।
नानाविषाश्च ये घोरा महोपविषसंज्ञकाः ।। ७७-८३ ।।
येऽस्मान्बाधितुमिच्छंति शरीरप्राणनाशकाः ।।
ते सर्वे कार्तवीर्यस्य खङ्कसाहस्रदारिताः ।। ७७-८४ ।।
दूरादेव विनश्यंतु प्रणष्टेंद्रियसाहसाः ।।
मनुष्याः पशवो त्वृक्षवानरा वनगोचराः ।। ७७-८५ ।।
सिंहव्याघ्रवराहाश्च महिषा ये महामृगाः ।।
गजास्तुरंगा गवया रासभाः शरभा वृकाः ।। ७७-८६ ।।
शुनका द्वीपिनः शुभ्रा मार्जारा बिललोलुपाः ।।
श्रृगालाः शशकाः श्येना गुरुत्मन्तो विहंगमाः ।। ७७-८७ ।।
भेरुंडा वायसा गूध्रा हंसाद्याः पक्षिजातयः ।।
उद्भिज्जाश्चांडजाश्चैव स्वेदजाश्च जरायुजाः ।। ७७-८८ ।।
नानाभेदकुले जाता नानाभेदाः पृथग्विधाः ।।
येऽस्मान्बाधितुमिच्छंति सेध्यासु च दिवा निशि ।। ७७-८९ ।।
ते सर्वे कार्तवीर्यस्य गदासाहस्रदारिताः ।।
दूरादेव विनश्यंतु विनष्टगतिपौरुषाः ।। ७७-९0 ।।
ये चाक्षेमप्रदातारः कूटमायाविनश्च ये ।।
मारणोत्सादनोन्मूलद्वेषमोहनकारकाः ।। ७७-९१ ।।
विश्वास घातका दुष्टा ये च स्वामिद्रुहो नराः ।।
ये चाततायिनो दुष्टा ये पापा गोप्यहारिणः ।। ७७-९२ ।।
दाहोपद्यातगरलशस्त्रपातातिदुःखदाः ।।
क्षेत्रवित्तादिहरणबंधनादिभयप्रदाः ।। ७७-९३ ।।
ईतयो विविधाकारो ये चान्ये दुष्टजातयः ।।
पीडाकरा ये सततं छिद्रमिच्छंति बाधितुम् ।। ७७-९४ ।।
ते सर्वे कार्तवीर्यस्य चक्रसाहस्रदारिताः ।।
दूरादेव क्षयं यांतु विनष्टबलसाहसाः ।। ७७-९५ ।।
ये मेघा ये महावर्षा ये वाता याश्च विद्युतः ।।
ये महाशनयो दीप्ता ये निर्घाताश्च दारुणाः ।। ७७-९६ ।।
उल्कापाताश्च ये घोरा ये महेंद्रायुधादयः ।।
सूर्येंदुकुजसौम्याश्च गुरुकाव्यशनैश्चराः ।। ७७-९७ ।।
राहुश्च केतवो घोरा नक्षत्रा राशयस्तथा ।।
तिथयः संक्रमा मासा हायना युगनायकाः ।। ७७-९८ ।।
मन्वंतराधिपाः सिद्धा ऋषयो योगसिद्धयः ।।
निधयो ऋग्यजुःसामाथर्वाणश्चैव वह्नयः ।। ७७-९९ ।।
ऋतवो लोकपालाश्च पितरो देवसंहतिः ।।
विद्याश्चैव चतुःषष्टिभेदा या भुवनत्रये ।। ७७-१00 ।।
ये त्वत्र कीर्तिताः सर्वे चये चान्ये नानुकीर्तिताः ।।
ते संतु नः सदा सौम्याः सर्वकालसुखावहाः ।। ७७-१0१ ।।
आज्ञया कार्तवीर्यस्य योगीन्द्रस्यामितद्युतेः ।।
कार्तवीर्यार्जुनो धन्वी राजेन्द्रो हैहयेश्वरः ।। ७७-१0२ ।।
दशास्यदर्पहा रेवालीलादृप्तकः सुदुर्जयः ।।
दुःखहा चौरदमनो राजराजेश्वरः प्रभुः ।। ७७-१0३ ।।
सर्वज्ञः सर्वदः श्रीमान् सर्वशिष्टेष्टदः कृती ।।
राजचूडामणिर्योगी सप्तद्वीपाधिनायकः ।। ७७-१0४ ।।
विजयी विश्वजिद्वाग्मी महागतिरलोलुपः ।।
यज्वा विप्रप्रियो विद्वान् ब्रह्मज्ञेयः सनातनः ।। ७७-१0५ ।।
माहिष्मतीपतिर्योधा महाकीर्तिर्महाभुजः ।।
सुकुमारो महावीरो मारीघ्नो मदिरेक्षणः ।। ७७-१0६ ।।
शत्रुघ्नः शाश्वतः शूरः शँखभृद्योगिवल्लभः ।।
महाभागवतो धीमान्महाभयविनाशनः ।। ७७-१0७ ।।
असाध्यी विग्रहो दिव्यो भावो व्याप्तजगत्त्रयः ।।
जितेंद्रियो जितारातिः स्वच्छंदोऽनंतविक्रममः ।। ७७-१0८ ।।
चक्रभृत्परचक्रघ्नः संग्रामविधिपूजितः ।।
सर्वशास्त्रकलाधरी विरजा लोकवंदितः ।। ७७-१0९ ।।
वीरो विमलसत्त्वाढ्यो महाबलपराक्रमः ।।
विजयश्रीमहामान्यो जितारिर्मंत्रनायकः ।। ७७-११0 ।।
खङ्गभृत्कामदः कांतः कालघ्नः कमलेक्षणः ।।
भद्रवादप्रियो वैद्यो विबुधो वरदो वशी ।। ७७-१११ ।।
महाधनो निधिपतिर्महायोगी गुरुप्रियः ।।
योगाढ्यः सर्वरोगघ्नो राजिताखिलभूतलः ।। ७७-११२ ।।
दिव्यास्त्रभृदमेयात्मा सर्वगोप्ता महोज्ज्वलः ।।
सर्वायुधधरोऽभीष्टप्रदः परपुरंजयः ।। ७७-११३ ।।
योगसिद्धो महाकायो महावृंदशताधिपः ।।
सर्वज्ञाननिधिः सर्वसिद्ध्विदानकृतोद्यमः ।। ७७-११४ ।।
इत्यष्टशतनामोत्त्या मूर्तयो दश दिक्पथि ।।
सम्यग्दशदिशो व्याप्य पालयंतु च मां सदा ।। ७७-११५ ।।
स्वस्थाः सर्वेन्द्रियाः संतुं शांतिरस्तु सदा मम ।।
शेषाद्या मूर्तयोऽष्टौ च विक्रमेणैव भास्वराः ।। ७७-११६ ।।
अग्निनिर्ऋतिवाय्वीशकोणगाः पांतु मां सदा ।।
मम सौख्यमसंबाधमारोग्यमपराजयः ।। ७७-११७ ।।
दुःखहानिरविघ्नश्च प्रजावृद्धिः सुखो दयः ।।
वांछाप्तिरतिकल्याणमवैषम्यमनामयम् ।। ७७-११८ ।।
अनालस्यमभीष्टं स्यान्मृत्युहानिर्बलोन्नतिः ।।
भयहानिर्यशः कांतिर्विद्या ऋद्धिर्महाश्रियः ।। ७७-११९ ।।
अनष्टद्रव्यता चैव नष्टस्य पुनरागमः ।।
दीर्घायुष्यं मनोहर्षः सौकुमार्यमभीप्सितम् ।। ७७-१२0 ।।
अप्रधृष्यतमत्वं च महासामर्थ्यमेव च ।।
संतु मे कार्तवीर्य्यस्य हैहयेंद्रस्य कीर्तनात् ।। ७७-१२१ ।।
य इदं कार्तवीर्य्यस्य कवच पुण्यवर्द्धनम् ।।
सर्वपापप्रशमनं सर्वोपद्रवनाशनम् ।। ७७-१२२ ।।
सर्वशांतिकरं गुह्यं समस्तभयनाशनम् ।।
विजयार्थप्रदं नॄणां सर्वसंपत्प्रदं शुभम् ।। ७७-१२३ ।।
श्रृणुयाद्वा पठेद्वापि सर्वकामानवाप्नुयात् ।।
चौरैर्हृतं यदा पश्येत्पश्वादिधनमात्मनः ।। ७७-१२४ ।।
सप्तवारं तदा जप्येन्निशि पश्चिमदिङ्मुखः ।।
सप्तरात्रेण लभते नष्टद्रव्यं न संशयः ।। ७७-१२५ ।।
सप्तविंशतिधा जप्त्वा प्राचीदिग्वदनः पुमान् ।।
देवासुरनिभं चापि परचक्रं निवारयेत् ।। ७७-१२६ ।।
विवादे कलहेघोरे पंचधा यः पठेदिदम् ।।
विजयो जायते तस्य न कदाचित्पराजयः ।। ७७-१२७ ।।
सर्वरोगप्रपीडासु त्रेधा वा पंचधा पठेत् ।।
स रोगमृत्युवेतालभूतप्रेतैर्न बाध्यते ।। ७७-१२८ ।।
सम्यग्द्वादशाधा रात्रौ प्रजपेद्बंधमुक्तये ।।
त्रिदिनान्निगडादूद्ध्वो मुच्यते नात्र संशयः ।। ७७-१२९ ।।
अनेनैव विधानेन सर्वसाधनकर्मणि ।।
असाध्यमपि सप्ताहात्साधयेन्मंत्रवित्तमः ।। ७७-१३0 ।।
यात्राकाले पठित्वेदं मार्गे गच्छति यः पुमान् ।।
न दुष्टचौरव्याघ्राद्यैर्भयं स्यात्परिपंथिभिः ।। ७७-१३१ ।।
जपन्नासेचनं कुर्वञ्जलेनांजलिना तनौ ।।
न चासौ विषकृत्यादिरोगस्फोटैः प्रबाध्यते ।। ७७-१३२ ।।
कार्तवीर्यः खलद्वेषी कृतवीर्यसुतो बली ।।
सहस्रबाहुः शत्रुघ्नो रक्तवासा धनुर्धरः ।। ७७-१३३ ।।
रक्तगंधोरक्तमाल्यो राजा स्मर्तुरभीष्टदः ।।
द्वादशैतानि नामानि कार्तवीर्यस्य यः पठेत् ।। ७७-१३४ ।।
संपदस्तस्य जायंते जनास्तस्य वशे सदा ।।
यः सेवते सदा विप्र श्रीमच्चचक्रावतारकम् ।। ७७-१३५ ।।
तस्य रक्षां सदा कुर्याच्चक्रं विष्णोर्महात्मनः ।।
मयैतत्कवचं विप्र दत्तात्रेयान्मुनीश्वरात् ।। ७७-१३६ ।।
श्रुतं तुभ्यं निगदितं धारयस्वाखिलेष्टदम् ।। ७७-१३७ ।।
इति श्रीबृहन्नारदीयपुराणे पूर्वभागे बृहदुपाख्याने तृतीयपादे कार्तवीर्यकवचकथनं नाम सप्तसप्ततितोमोऽध्यायः ।। ७७ ।।