नारदपुराणम्- पूर्वार्धः/अध्यायः ९७
श्रीब्रह्मोवाच ।।
श्रृणु विप्र प्रवक्ष्यामि पुराणं नारदीयकम् ।।
पंचविंशतिसाहस्रं बृहत्कल्पकथाश्रयम् ।। ९७-१ ।।
सूतशौनकसंवादः सृष्टिसंक्षेपवर्णनम् ।।
नानाधर्मकथाः पुण्याः प्रवृत्ते समुदाहृताः ।। ९७-२ ।।
प्राग्भागे प्रथमे पादे सनकेन महात्मना ।।
द्वितीये मोक्षधर्माख्ये मोक्षोपायनिरूपणम् ।। ९७-३ ।।
वेदांगानां च कथनं शुकोत्पत्तिश्च विस्तरात् ।।
सनंदनेन गदिता नारदाय महात्मने ।। ९७-४ ।।
महातंत्रे समुद्दिष्टं पशुपाशविमोक्षणम् ।।
मंत्राणां शोधनं दीक्षामंत्रोद्धारश्च पूजनम् ।। ९७-५ ।।
प्रयोगाः कवचं नामसहस्रं स्तोत्रमेव च ।।
गणेशसूर्यविष्णूनां शिवशक्त्योरनुक्रमात् ।। ९७-६ ।।
सनत्कुमारमुनिना नारदाय तृतीयके ।।
पुराणलक्षणं चैव प्रमाणं दानमेव च ।। ९७-७ ।।
पृथक्पृथक् समुद्दिष्टं दानकालपुरःसरम् ।।
चैत्रादिसर्वमासेषु तिथीनांचपृथक्पृथक् ।। ९७-८ ।।
प्रोक्तं प्रतिपदादीनां व्रतं सर्वाघनाशनम् ।।
सनातनेन मुनिना नारदाय चतुर्थके ।। ९७-९ ।।
पूर्वभागोऽयमुदितो बृहदाख्यानसंज्ञितः ।।
अस्योत्तरे विभागे तु प्रश्न एकादशीव्रते ।। ९७-१० ।।
वसिष्ठेनाथ संवादो मांधातुः परिकीर्तितः ।।
रुक्मांगदकथा पुण्यामोहिन्युत्पत्तिकर्म च ।। ९७-११ ।।
वसुशापश्च मोहिन्यै पश्चादुद्धरणक्रिया ।।
गंगाकथा पुण्यतमा गयायात्रानुकीर्तनम् ।। ९७-१२ ।।
काश्या माहात्म्यमतुलं पुरुषोत्तमवर्णनम् ।।
यात्राविधानं क्षेत्रस्य बह्वाख्यानसमन्वितम् ।। ९७-१३ ।।
प्रयागस्याथ माहात्म्यं कुरुक्षेत्रस्य तत्परम् ।।
हरिद्वारस्य चाख्यानं कामोदाख्यानकं तथा ।। ९७-१४ ।।
बदरीतीर्थमाहात्म्यं कामाक्षायास्तथैव च ।।
प्रभासस्य च माहात्म्यं पुष्कराख्यानकं ततः ।। ९७-१५ ।।
गौतमाख्यानकं पश्चाद्वेदपादस्तवस्ततः ।।
गोकर्णक्षेत्रमाहात्म्यं लक्ष्मणाख्यानकं तथा ।। ९७-१६ ।।
सेतुमाहात्म्यकथनं नर्मदातीर्थवर्णनम् ।।
अवंत्याश्चैव माहात्म्यं मधुरायास्ततः परम् ।। ९७-१७ ।।
बृन्दावनस्य महिमा पशोर्ब्रह्मांतिके गतिः ।।
मोहिनीचरितं पश्चादेवं पश्चादेवं वै नारदीयकम् ।। ९७-१८ ।।
यः शृणोति नरो भक्त्याश्रावयेद्वा समाहितः ।।
स याति ब्रह्मणो धाम नात्र कार्या विचारणा ।। ९७-१९ ।।
यस्त्वेतदिषुपूर्णायां धेनूनां सप्तकान्वितम् ।।
प्रदद्याद्दिजंर्याय संलभेन्मोक्षमेव च ।। ९७-२० ।।
यश्चानुक्रमणीमेतां नारदीयस्य वर्णयेत् ।।
श्रृणुयद्वैकचित्तेन सोऽपि स्वर्गगतिं लभेत् ।। ९७-२१ ।।
इति श्रीबृहन्नारदीयपुराणे पूर्वभागे बृहदुपाख्याने चतुर्थपादे नारदीयपुराणानुक्रमणीकथनं नाम सप्तनवतितमोऽध्यायः ।। ९७ ।।