महाभारतम्-01-आदिपर्व-014
| ← आदिपर्व-013 | महाभारतम् प्रथमपर्व महाभारतम्-01-आदिपर्व-014 वेदव्यासः |
आदिपर्व-015 → |
वासुकिभगिन्या जरत्कारोर्विवाहः।। 1 ।।
सौतिरुवाच।
ततो निवेशाय तदा स विप्रः संशितव्रतः।
महीं चचार दारार्थी न च दारानविन्दत।। 1-14-1
स कदाचिद्वनं गत्वा विप्रः पितृवचः स्मरन्।
[१]चुक्रोश कन्याभिक्षार्थी [२]तिस्रो वाचः शनैरिव।। 1-14-2
तं वासुकिः प्रत्यगृह्णादुद्यम्य भगिनीं तदा।
न स तां प्रतिजग्राह न सनाम्नीति चिन्तयन्।। 1-14-3
सनाम्नीं चोद्यतां भार्यां गृह्णीयामिति तस्य हि।
मनो निविष्टमभवज्जरत्कारोर्महात्मनः।। 1-14-4
1-14-4b
तमुवाच महाप्राज्ञो जरत्कारुर्महातपाः।
किंनाम्नी भगिनीयं ते ब्रूहि सत्यं भुजंगम।। 1-14-5
वासुकिरुवाच।
[३]जरत्कारो जरत्कारुः स्वसेयमनुजा मम।
प्रतिगृह्णीष्व भार्यार्थे मया दत्तां सुमध्यमाम्।
त्वदर्थं रक्षिता पूर्वं प्रतीच्छेमां द्विजोत्तम।। 1-14-6
सौतिरुवाच।
एवमुक्त्वा ततः प्रादाद्भार्यार्थे वरवर्णिनीम्।
स च तां प्रतिजग्राह विधिदृष्टेन कर्मणा।। 1-14-7
।। इति श्रीमन्महाभारते आदिपर्वणि आस्तीकपर्वणि चतुर्दशोऽध्यायः।। 14 ।।
संपादित करें
1-14-1 निवेशाय दारसंग्रहाय।। चतुर्दशोऽध्यायः।। 14 ।।
| आदिपर्व-013 | पुटाग्रे अल्लिखितम्। | आदिपर्व-015 |
- ↑ द्र. अङ्गिरसां संक्रोशः
- ↑ अथैते द्वे यजुषी । सो अनुष्टुबेव वाग्वा अनुष्टुप्तद्यदिदं द्वयं वाचो रूपं दैवं च मानुषं चोच्चैश्च शनैश्च तदेते द्वे । ता वा एतास्तिस्रोऽनुष्टुभः । चित एष गार्हपत्यस्तद्यदेता अत्र तिस्रोऽनुष्टुभ.. - माश ७.१.२.१८
- ↑ जरत्कारु उपरि संक्षिप्त टिप्पणी