महाभारतम्-12-शांतिपर्व-206

महाभारतम्
द्वादशपर्व
महाभारतम्-12-शांतिपर्व-206
वेदव्यासः

भीष्मेण युधिष्ठिरंप्रति भूतादिजगत्सृष्टिप्रकारनिरूपणम्।। 1।। तथा नारदोदितनृसिंहादिभगवत्प्रादुर्भावचरित्रनिरूपणपूर्वकं श्रीकृष्णस्य सर्वोत्तमत्वप्रतिपादनेन तद्ध्यानविधानम्।। 2।।

युधिष्ठिर उवाच।	12-206-1x
पितामह महाप्राज्ञ पुण्‍डरीकाक्षमच्युतम्। कर्तारमकृतं विष्णुं भूतानां प्रभवाप्ययम्।।	12-206-1a 12-206-1b
नारायणं हृषीकेशं गोविन्दमपराजितम्। तत्त्वेन भरतश्रेष्ठ श्रोतुमिच्छामि केशवम्।।	12-206-2a 12-206-2b
भीष्म उवाच।	12-206-3x
श्रुतोऽयमर्थो रामस्य जामदग्न्यस्य जल्पतः। नारदस्य च देवर्षेः कृष्णद्वैपायनस्य च।।	12-206-3a 12-206-3b
असितो देवलस्तात वाल्मीकिश्च महातपाः। मार्कण्डेयश्च गोविन्दे कथयन्त्यद्भुतं महत्।।	12-206-4a 12-206-4b
`केशवस्य मया राजन्न शक्या वर्णितुं गुणाः। ईदृशोऽसौ हृषीकेशो वासुदेवः परात्परः।।'	12-206-5a 12-206-5b
केशवो भरतश्रेष्ठ भगवानीश्वरः प्रभुः। पुरुषः सर्वमित्येव श्रूयते बहुधा विभुः।।	12-206-6a 12-206-6b
किंतु यानि विदुर्लोके ब्राह्मणाः शार्ङ्गधन्वनि। महात्मनि महाबाहो शृणु तानि युधिष्ठिर।।	12-206-7a 12-206-7b
यानि चाहुर्मनुष्येन्द्र ये पुराणविदो जनाः। श्रुत्वा सर्वाणि गोविन्दो कीर्तयिष्यामि तान्यहम्।।	12-206-8a 12-206-8b
महाभूतानि भूतात्मा महात्मा पुरुषोत्तमः। वायुर्ज्योतिस्तथा चापः खं च गां चान्वकल्पयत्।।	12-206-9a 12-206-9b
स सृष्ट्वा पृथिवीं चैव सर्वभूतेश्वरः प्रभुः। अप्स्वेव शयनं चक्रे महात्मा पुरुषोत्तमः।।	12-206-10a 12-206-10b
सर्वतेजोमयस्तस्मिञ्शयानः शयने शुभे। सोऽग्रजं सर्वभूतानां संकर्षणमचिन्तयत्।।	12-206-11a 12-206-11b
आश्रयं सर्वभूतानां मनसेतीह शुश्रुम्। स धारयति भूतानि उभे भूतभविष्यती।।	12-206-12a 12-206-12b
`प्रद्युम्नमसृजत्तस्मात्सर्वतेजः प्रकाशकम्। अनिरुद्धस्ततो जज्ञे सर्वशक्तिर्महाद्युतिः।।	12-206-13a 12-206-13b
अप्सु व्योमगतः श्रीमान्योगनिद्रामुपेयिवान्। तस्मात्संजज्ञिरे देवा ब्रह्मविष्णुमहेश्वराः। लयस्थित्यन्तकर्माणस्रयस्ते सुमहौजसः।।'	12-206-14a 12-206-14b 12-206-14c
ततस्तस्मिन्महाबाहौ प्रादुर्भूते महात्मनि। भास्करप्रतिमं दिव्यं नाभ्यां पद्ममजायत।।	12-206-15a 12-206-15b
स तत्र भगवान्देवः पुष्करे भ्राजयन्दिशः। ब्रह्मा समभवत्तात सर्वभूतपितामहः।।	12-206-16a 12-206-16b
तस्मिन्नपि महाबाहौ प्रादुर्भूते महात्मनि। तमसः पूर्वजो जज्ञे मधुर्नाम महासुरः।।	12-206-17a 12-206-17b
तमुग्रमुग्रकर्माणमुग्रां बुद्धिं समास्थितम्। ब्रह्मणोपचितिं कुर्वञ्जघान पुरुषोत्तमः।।	12-206-18a 12-206-18b
तस्य तात वधात्सर्वे देवदानवमानवाः। मधुसूदनमित्याहुर्ऋषभं सर्वसात्वताम्।।	12-206-19a 12-206-19b
ब्रह्माऽनुससृजे पुत्रान्मानसान्दक्षसप्तमान्। मरीचिमत्र्यङ्गिरसौ पुलस्त्यं पुलहं क्रतुम्।।	12-206-20a 12-206-20b
मरीचिः कश्यपं तात पुत्रमग्रजमग्रजः। मानसं जनयामास तैजसं ब्रह्मवित्तमम्।।	12-206-21a 12-206-21b
अङ्गुष्ठात्ससृजे ब्रह्मा मरीचेरपि पूर्वजम्। सोऽभवद्भरतश्रेष्ठ दक्षो नाम प्रजापतिः।।	12-206-22a 12-206-22b
तस्य पूर्वमजायन्त दश तिस्रश्च भारत।। प्रजापतेर्दुहितरस्तासां ज्येष्ठाऽभवद्दितिः।।	12-206-23a 12-206-23b
सर्वधर्मविशेषज्ञः पुण्यकीर्तिर्महायशाः। मारीचः कश्यपस्तात सर्वासामभवत्पतिः।।	12-206-24a 12-206-24b
उत्पाद्य तु महाभागस्तासामवरजा दश। ददौ धर्माय धर्मज्ञो दक्ष एव प्रजापतिः।।	12-206-25a 12-206-25b
धर्मस्य वसवः पुत्रा रुद्राश्चामिततेजसः। विश्वेदेवाश्च साध्याश्च मरुत्वन्तश्च भारत।।	12-206-26a 12-206-26b
अपराश्च यवीयस्यस्ताभ्योऽन्याः सप्तविंशतिः। सोमस्तासां महाभागः सर्वासामभवत्पतिः।।	12-206-27a 12-206-27b
इतरास्तु व्यजायन्त गन्धवोस्तुरगान्द्विजान्। गाश्च किंपुरुषान्मत्स्यानुद्भिज्जांश्च वनस्पतीन्।।	12-206-28a 12-206-28b
आदित्यानदितिर्जज्ञे देवश्रेष्ठान्महाबलान्। तेषां विष्णुर्वामनोऽभूद्गोविन्दश्चाभवत्प्रभुः।।	12-206-29a 12-206-29b
तस्य विक्रमणाच्चापि देवानां श्रीर्व्यवर्धत। दानवाश्च पराभूता दैतेयाश्चासुरी प्रजा।।	12-206-30a 12-206-30b
विप्रचित्तिप्रधानांश्च दानवानसृजद्दनुः। दितिस्तु सर्वानसुरान्महासत्वानजीजनत्।।	12-206-31a 12-206-31b
`ततः ससर्ज भगवान्मृत्युं लोकभयंकरम्। हर्तारं सर्व भूतानां ससर्ज च जनार्दनः।।	12-206-32a 12-206-32b
अहोरात्रं च कालं च यथर्तु मधुसूदनः। पूर्वाह्णं चापराह्णं च सर्वमेवान्वकल्पयत्।।	12-206-33a 12-206-33b
लब्ध्वापः सोऽसृजन्मेघांस्तथा स्थावरजङ्गमान्। पृथिवीं सोऽसृजद्विश्वां सहीतां भूरितेजसा।।	12-206-34a 12-206-34b
ततः कृष्णो महाभागः पुनरेव युधिष्ठिर। ब्राह्मणानां शतं श्रेष्ठं मुखादेवासृजत्प्रभुः।।	12-206-35a 12-206-35b
बाहुभ्यां क्षत्रियशतं वैश्यानामूरुतः शतम्। पद्भ्यां शूत्रशतं चैव कशेवो भरतर्षभ।।	12-206-36a 12-206-36b
स एवं चतुरो वर्णान्समुत्पाद्य महातपाः। अध्यक्षं सर्व भूतानां धातारमकरोत्स्वयम्।।	12-206-37a 12-206-37b
वेदविद्याविधातारं ब्रह्माणमतितद्युतिम्। भूतमातृगणाध्यक्षं विरूपाक्षं च सोऽसृजत्।।	12-206-38a 12-206-38b
शासितारं च पापानां पितृणां समवर्तिनम्। असृजत्सर्वभूतात्मा निधिपं च धनेश्वरम्।।	12-206-39a 12-206-39b
यादसामसृजन्नाथं वरुणं च जलेश्वरम्। वासवं सर्वदेवानामध्यक्षमकरोत्प्रभुः।।	12-206-40a 12-206-40b
यावद्यावदभूच्छ्रद्धा देहं धारयितुं नृणाम्। तावत्तावदजीवंस्ते नासीद्यमकृतं भयम्।।	12-206-41a 12-206-41b
न चैषां मैथुनो धर्मो बभूव भरतर्षभ। संकल्पादेव चैतेषां गर्भः समुपपद्यते।।	12-206-42a 12-206-42b
ततस्रेतायुगे काले संस्पर्शाज्जायते प्रजा। न ह्यभून्मैथुनो धर्मस्तेषामपि जनाधिप।।	12-206-43a 12-206-43b
द्वापरे मैथुनो धर्मः प्रजानामभवन्नृप। तथा कलियुगे राजन्द्वन्द्वमापेदिरे जनाः।।	12-206-44a 12-206-44b
एष भूतपतिस्तात स्वध्यक्षश्च तथोच्यते। निरपेक्षांश्च कौन्तेय कीर्तयिष्यामि तच्छृणु।।	12-206-45a 12-206-45b
दक्षिणापथजन्मानः सर्वे करभृतस्तव। आन्ध्राः पुलिन्दाः शवराश्चूचुपा मद्रकैः सह।।	12-206-46a 12-206-46b
उत्तरापथजन्मानः कीर्तयिष्यामि तानपि। ये तु काम्भोजगान्धाराः किराता बर्वरैः सह।।	12-206-47a 12-206-47b
एते पापकृतस्तात चरन्ति पृथिवीमिमाम्। बकश्वपाकगृध्राणां सधर्माणो नराधिप।।	12-206-48a 12-206-48b
नैते कृतयुगे तात चरन्ति पृथिवीमिमाम्। त्रेताप्रभुति वर्धन्ते ते जना भरतर्षभ।।	12-206-49a 12-206-49b
ततस्तस्मिन्महाघोरे संन्ध्याकाले युगान्तिके। राजानः समसज्जन्त समासाद्येतरेतम्।।	12-206-50a 12-206-50b
`ऐन्द्रं रूपं समास्थाय ह्यसुरेभ्यो चरन्महीम्। स एव भगवान्देवो वेदित्वं च गता मही।।	12-206-51a 12-206-51b
एवंभूते सृष्टिर्नारसिंहादयः क्रमात्। प्रादुर्भावाः स्मृता विष्णोर्जगतीरक्षणाय वै।।	12-206-52a 12-206-52b
एष कृष्णो महायोगी तत्तत्कार्यानुरूपणम्। हिरण्यकशिपुं दैत्यं हिरण्याक्षं तथैव च।।	12-206-53a 12-206-53b
रावणं च महादैत्यं हत्वासौ पुरुषोत्तमः। भूमेर्दुःखोपनाशार्थं ब्रह्मशक्रादिभिः स्तुतः।।	12-206-54a 12-206-54b
आत्मनोऽङ्गान्महातेजा उद्वबर्ह जनार्दनः। सितकृष्णौ महाराज केशौ हरिरुदारधीः।।	12-206-55a 12-206-55b
वसुदेवस्य देवक्यामेष जात इहोत्तमः। देहवानिह विश्वात्मा संबन्धी ते जनार्दनः।।	12-206-56a 12-206-56b
आविर्वभूव योगीन्द्रो मनोतीतो जगत्पतिः। अचिन्त्यः पुरुषव्याघ्र नैव केवलमानुषः।।	12-206-57a 12-206-57b
अव्यक्तादिविशेषान्तं परिमाणार्थसंयुतम्। क्रीडा हरेरिदं सर्वं क्षरमित्येव धार्यताम्।।	12-206-58a 12-206-58b
अक्षरं तत्परं नित्यं वैरूप्यं जगतो हरेः। तद्विद्धि रूपमतुलममृतत्वं भवज्जितम्।।	12-206-59a 12-206-59b
तदेव कृष्णो दाशार्हः श्रीमाञ्श्रीवत्सलक्षणः। न भूतसृष्टिसंस्थानं देहोऽस्य परमात्मनः।।	12-206-60a 12-206-60b
देहवानिह यो विष्णुरसौ मायामयो हरिः। आत्मनो लोकरक्षार्थं ध्याहि नित्यं सनातनम्।।	12-206-61a 12-206-61b
अङ्गानि चतुरे वेदा मीमांसा न्यायविस्तरः। इतिहासपुराणानि धर्माः स्वायंभुवादयः।।	12-206-62a 12-206-62b
य एनं प्रतिवर्तन्ते वेदान्तानि च सर्वशः। भक्तिहीना न तैर्यान्ति नित्यमेनं कथंचन।।	12-206-63a 12-206-63b
सर्वभूतेषु भूतात्मा तत्तद्बुद्धिं समास्थितः। तस्माद्बुद्धस्त्वमेवैनं ध्याहि नित्यमतन्द्रितः।।'	12-206-64a 12-206-64b
एवमेष कुरुश्रेष्ठ प्रादुर्भावो महात्मनः। एवं देवर्षिराचष्ट नारदः सर्वलोकदृक्।।	12-206-65a 12-206-65b
नारदोऽप्यथ कृष्णस्य परं मेने नराधिप। शाश्वतत्वं महाबाहो यथावद्भरतर्षभ।।	12-206-66a 12-206-66b
एवमेव महाबाहुः केशवः सत्यविक्रमः। अचिन्त्यः पुण्डरीकाक्षो नैष केवलमानुषः।।	12-206-67a 12-206-67b
`एवंविधोऽसौ पुरुषः को वैनं वेत्ति सर्वदा। एतत्ते कथितं राजन्भूयः श्रोतुं किमिच्छसि'।।	12-206-68a 12-206-68b
।। इति श्रीमन्महाभारते शान्तिपर्वणि मोक्षधर्मपर्वणि षडधिकद्विशततमोऽध्यायः।। 206।।

12-206-1 कर्तारममृतं विष्णुमिति ड. थ. पाठः।। 12-206-25 ततस्त्वरजसो दशेति ड. थ. पाठः।। 12-206-28 द्विरदांश्च वनस्पतीनिति ड. पाठः। विशदांश्च वनस्पतीनिति ध. पाठः। इतराः कश्यपस्त्रियः। व्यजायन्त व्यजनयन्त।। 12-206-35 शतमनन्तम्।। 12-206-39 समवर्तिनं यमम्।।

शांतिपर्व-205

पुटाग्रे अल्लिखितम्।

शांतिपर्व-207